Эдийн засгийн бодлого, өрсөлдөх чадварын судалгааны төвөөс Улаанбаатар хотын дүүргүүдийн өрсөлдөх чадварын анхны тайлангийн үр дүнг танилцууллаа. Тус байгууллага нь 2010 оноос “Монгол Улсын өрсөлдөх чадварын тайлан”, 2012 оноос “Аймгуудын өрсөлдөх чадварын тайлан”-г жил бүр гаргасаар иржээ. Энэ удаа судалгааны хүрээгээ өргөжүүлж “Улаанбаатар хотын 9 дүүргүүдийн өрсөлдөх чадварын тайланг” нийслэлийн Иргэдийн Төлөөлөгчдийн Хурал болон Азийн сангийн дэмжлэгтэйгээр гүйцэтгэжээ.
Судалгаагаар Баянгол дүүрэг өрсөлдөх чадварын индекс хамгийн өндөр гарсан бол Хан-Уул дүүрэг хоёрдугаар байрт орсон байна. Өрсөлдөх чадвар сул дүүргээр Налайх, Багануур дүүргүүд орсон байна.
Дүүргүүдийн өрсөлдөх чадварыг дараах 5 үндсэн бүлгийн хүрээнд нарийвчлан тодорхойлсон нийт 150 шалгуур үзүүлэлтээр хэмжсэн байна. Эдгээр шалгуур үзүүлэлтүүдийн мэдээллийг дүүргүүдийн албан ёсны статистик мэдээлэл болон өрхийн асуулгын мэдээллээр цуглуулж энэхүү дүнг гарсан аж.