Хан-Уул дүүргийн Засаг даргын тамгын газрын Нийгмийн хөгжлийн хэлтэс, Дэлхийн Зөн Монгол Олон Улсын байгууллагатай хамтран “ХАРААЦАЙ” хүүхдийн урлагийн их наадмыг 10 дахь жилдээ зохион байгуулж байна.

Хүүхэд багачуудын авьяас чадварыг нээн илрүүлэх, бага наснаас нь гоо зүйн мэдрэмжтэй болгох, бие бялдарыг нь хөгжүүлэн өв тэгш хүмүүжил олгохоос гадна сургууль, цэцэрлэгүүдийн дуу хөгжмийн багш нарын мэдлэг, ур чадварыг дээшлүүлэх зорилготой энэхүү тэмцээн өнөөдөр цэцэрлэгийн насны ангилалд шилдэгүүдээ тодрууллаа.

Энэ жилийн хувьд наадмын нэгдүгээр шатны шалгаруулалтыг сургууль, цэцэрлэг тус бүрдээ зохион байгуулсан бөгөөд 2 дугаар шатны шалгаруулалтад “Гоцлол дуу”, “Хамтлаг дуу”, “Хамтлаг бүжиг”, “Гоцлол хөгжим”, “Хамтлаг хөгжим” зэрэг 5 төрлөөр авьяас чадвараа сорин өрсөлдөж байна.

“Хараацай” хүүхдийн урлагийн их наадам гурван өдөр үргэлжлэх бөгөөд 3 насны ангиллаар тус дүүргийн Соёлын ордонд болно.

Жилээс жилд хүрээгээ тэлсэн “Хараацай” урлагийн наадамд Хан-Уул дүүргийн төр болон хувийн өмчийн сургууль, цэцэрлэгүүдийн шилдэг хүүхдүүд оролцдог шалгуур өндөр наадам гэдгээрээ онцлог юм.

                                                                                     ИТХ-ЫН ТЭРГҮҮЛЭГЧДИЙН АЖЛЫН АЛБА