Хан-Уул дүүргийн 10 дугаар хороонд байрлах “Буянт-Ухаа 2” хорооллын оршин суугчдад өнөөдөр 240 хүүхдийн ортой цэцэрлэгийг хүлээлгэн өгөх ёслолын арга хэмжээ боллоо.  

Шинэ цэцэрлэгийн нээлтийн ажиллагаанд УИХ-ын гишүүн Б.Энх-Амгалан, ТОСК-ийн Ерөнхий захирал Ж.Хичээнгүй, Хан-Уул дүүргийн ИТХ-ын дарга Б.Цэрэн, НИТХ-ын Тэргүүүлэгч, Хан-Уул дүүргийн Засаг дарга Ж.Алдаржавхлан, дүүргийн ИТХ-ын Тэргүүлэгч Ч.Базарзаяа, ИТХ-ын Төлөөлөгч, ХУД-ийн 10-р хорооны Засаг дарга Ц.Чинзоригт, ХУД-ийн Боловсролын хэлтсийн дарга Ж.Отгонхорлоо болон оршин суугчдын төлөөлөл оролцсон юм.

250 дугаар цэцэрлэгийн нэг давхарт нь бага, дунд бүлгийн 5 өрөө, унтлагын 5 өрөө, хувцас солих өрөө, эмчийн үзлэгийн өрөө, ариун цэврийн өрөө, түр хэмтүүлэн эмчлэх өрөө, агуулах, гал тогоо зэрэг өрөөтэй, нийт 933,86м2 талбайтай аж.  Харин хоёр давхарт ахлах, дунд бүлгийн 5 өрөө, унтлагын 5 өрөө, хувцас солих өрөө, эрхлэгчийн өрөө, аж ахуйн өрөө, ариун цэврийн өрөө, дуу хөгжмийн өрөө, багш, ажилчдын өрөөтэй, нийт 933,86м2 талбайтай 240 хүүхэд хүлээн авах хүчин чадалтай байхаар тохижуулжээ. 

Хан-Уул дүүргийн ИТХ-ын Төлөөлөгч, 10-р хорооны Засаг дарга Ц.Чинзоригт нээлтийн үеэр хэлэхдээ “Буянт-Ухаа 2” хороололд өнөөдрийн байдлаар цэцэрлэгийн насны 800 гаруй хүүхэд байгаа, гэсэн хэдий ч өнөөдөр 240 ортой шинэ цэцэрлэг нээгдэж байгаа нь олон эцэг эхчүүдийн ачааллыг хөнгөвчлөн өгч байна” гэсэн юм.