Иргэдийн саналын дагуу аймгийн ИТХ-ын даргаас өгсөн үүрэг чиглэлийн дагуу өнөөдөр /2015.10.28/ “СӨХ-дын үйл ажиллагааг сайжруулах тухай” өргөтгөсөн уулзалтыг аймгийн ИТХурал, Захирагчийн ажлын алба хамтран зохион байгууллаа.
Уулзалтанд аймгийн Засаг дарга А.Энхболд, аймгийн ЗАА-ны дарга Д.Батжаргал, аймгийн ИТХ-ын Ажлын албаны ахлах ажилтан Н.Буманцэцэг болон багийн ИНХ-ны дарга, Засаг дарга, СӨХ-дын Дархан салбар зөвлөл, СӨХ-дын тэргүүлэгчид, гүйцэтгэх захирал, Инженерийн шугам сүлжээний байгууллагуудын холбогдох мэргэжилтэнгүүд, НААҮГ-ынхан оролцлоо.
Уулзалтаар нийтийн зориулалттай орон сууцны өнөөгийн байдал, Улсын болон орон нутгийн төсвөөр хийгдсэн ажлуудын тухай, СӨХ-дын гүйцэтгэх захирлын үйл ажиллагаа, Нийтийн зориулалтай орон сууцны /НЗОС/ ашиглалт, хамгаалалт, өвөлжилтийн бэлтгэл ажлын талаар, НЗОС-нд оршин суугчдын өргөдөл, гомдол, саналын тухай, СӨХ-дын бүтэц зэрэг тулгамдсан асуудлуудыг хөндөн ярив.
Уулзалтанд оролцогчид СӨХ-ны үйл ажиллагааг сайжруулахын тулд нэн тэргүүнд Орон сууцны конторыг байгуулах нь зөв гэж үзэж байлаа. Энэ асуудлаар 2013 онд аймгийн ИТХурлын дэргэдэх “Иргэний танхим”-аар хэлэлцүүлэн, улмаар аймгийн ИТХ-ын Тэргүүлэгчдийн хурлаар оруулж, 2014.01.05-ны өдрийн 03 дугаар тогтоолыг баталсан боловч өнөөг хэр нь байгуулагдаагүй байна.
